Contact
Subscribe
February 16, 2008 
manilenya
Kung ang habol mo sa paninigarilyo ay ang usok na lumalabas sa bibig o ilong mo, at paminsan-minsang paglabas nito sa tenga mo (kung nagtitrip o kaya nama’y feeling mo isa kang magician na yosi boy o yosi girl), dito sa malamig na kinauupuan ko e malamang hindi ka na magyosi. Lalo na kapag nalaman mong aabot sa kulang 400 pesos ang isang kaha.
Pero kung adik ka naman sa usok ng sigarilyo (hindi sa nikotina), okey lang. Yosi pa rin.
Matagal na akong hindi nagyoyosi, hmmnn mga kulang isang taon mula ng bigyan ako ng problema ng embahada ng Canada sa Singapore dahil daw sa “depektibo” kong baga, pero salamat naman sa Diyos dahil pagkatapos ng apat na X-ray, ESR kung saan makikita kung may kanser ka o wala, sputum examination at TB skin test, eto ako walong buwan na rin mahigit sa bansang Canada.
Pero syempre dahil sa naging bespren ko si Yosi, di maiiwasang tumikim paminsan-minsan. Kahit na ba sabihin ko pang sinumpa ko talaga siya noon. Lalo na kung iyong kasama mo sa bahay e may isang medyo kalakihang ziplock na punumpuno ng yosi at lalong lalo na kapag kaharap mo siya sa inuman at binubugahan ka ng usok. Ano siya hilo? kailangang makaganti ano!
Yun nga lang kapag ganitong malamig, hindi mo alam kung ang lumalabas na usok sa bibig mo e galing nga sa yosi na sininghot mo o dahil sa talagang sobrang lamig nga lang. Nakakainis din.
———-
Kwentong nakakatuwa o kwentong praning:
Noong mga unang bagsak ng Fall Season dito, syempre unang fall season ko rin. Habang nagluluto ako ng B-b-que sa likod bahay, napansin kong sa tuwing ibubuka ko yung bibig ko e me lumalabas na usok sa sobrang lamig. Syempre first time ko kaya ang saya ng feeling. Kaya kahit wala akong kausap buka ako ng buka ng bibig. Tapos ngingiti ako. Tapos bubuka ulit ako ng bibig. Minsang nagsasalita at minsang umaastang bumubuga ng usok galing sa sigarilyo. Parang praning nga.
| 2.5 |
Viewed 1751 times by 409 viewers
Comment by 
