Nabasa ko na ang dapat kong mabasa. Nasabi ko na ang dapat kong masabi sa comment box ng mga blog na napasyalan ko. Hindi ko dapat samahan ng anumang emosyon ang blog ko ngayon, pero maalis ko ba yun?
Ayun sa Channel News Asia 73 ang kumpirmadong namatay at mahigit 300 ang mga sugatan. Ang balitang nakuha namin kagabi ay 79 ang patay at bukod sa mga sugatan marami pa ang nawawala.
Hindi na bago ang mga puna ko sa Wowowee ng ABS-CBN, at hindi na rin bago ang pamumuna ko sa istasyon mismo.
Ang sabi wag na daw magsisihan pa. E di sige wag na ngang magsisihan pa. Pero yung makarinig ka na “hindi naman dahil sa rating to” habang umiiyak sa telebisyon si Willie Revillame ay nakadagdag lang ng panibagong komento pa galing sa mga manonood. Ang sabi ng bayaw ko, “kaya pala madalas nya sabihin na “kami na ang number one!” sa programa nya. At para ipakita nga na number one, sa pagdiriwang ng ika-isang taong annibersaryo ay sa Ultra gaganapin. Maraming manonood ang pupunta, syempre pa dahil sa mga premyo na ipamimigay.
Sukdulan na ang labanan sa rating ng mga istasyong ito.
Kailangan pang may magbuwis ng buhay para masabing sila ang nangunguna, sila ang number one.
Sa pangyayaring ito may isang maikling palabas akong naalala. Dalawang beses lang namin itong ipinalabas noong nasa kolehiyo pa ko. Noong una ay sa General Assembly ng mga incoming freshman ng PUP ang sumunod ay sa isang pagtitipon ng mga unyon ng manggagawa ng Philips Philippines.
Ang senaryo ay pagkatapos ng nucler war, naging malagim ang dulot ng gyerang yung, maraming namatay, naapektuhan ang anumang kabuhayan, may mga nabuhay man para namang mga buhay na patay, pumangit ang mga balat animo mga zombie. At dahil walang kabuhayan, walang makain. Minsan may nakitang pagkain. kaunti lang ito para sa mga natitirang buhay. Kailangang mabuhay ng mga natitirang tao kaya ang nangyari agawan sila sa pagkain. Mauna sa pagkain, may itatagal pang buhay syempre. Kaya kailangang pumatay para sa pagkain, Matira matibay. Kaya nag-asal hayop ang mga tao.
Iniisip ko kung ganon na ba katindi ang pang-ekonomiyang sitwasyong ng pinas? May ipinapangakong dalawang milyon ang Wowowee. May sinasabing mga sasakyan ang host ng programa na personal pa nyang kinausap ang mga me ari ng kumpanya ng mga nasabing papremyo. May paraffle na hinahabol ang mga taong nandoon na galing pa sa iba’t ibang probinsya. At syempre pa bukod pa doon ang pampabwenas na ibibigay na pera na galing sa mga TFC subscriber sa twing mag jojoke ka.
Ang interview sa mga taong manonood sana doon ang nagsasabing hindi ang kanilang pagbibigay saya ang pakay nila sa programa. kundi ang konting tulong na madalas sabihin ni Willie Revillame sa kanilang programa. Marami ang mga walang pamasahe pauwi. Marami ang nangangarap na makakuha ng premyo. Marami ang gustong magkapera.
At dahil sa marami ang nangangailangan ng pera, naging mabisang paraan ito para sa ABS-CBN para umangat sa rating, para makahila ng mga advertisers at para makakuha ng donasyon para sa mga foundation nila.
Masyadong naghangad ng kagitna. Ano ngayon ang bumalik sa kanila?
Maibabalik ba nila ang buhay ng mga “kapamilya”?
Viewed 1072 times by 50 viewers